Aug 17, 2018

News

Armenian Video

Hosting

Linki

Armenia

edit SideBar

Szukaj

Lragir - Լրագիր

English

RSS feed: Լրագիր

Սուր հեպատիտ B և հեպատիտ C հիվանդությունների նվազման միտումներ կան

Ըստ 2015 թվականից մինչ օրս անցկացվող հետազոտությունների՝ սուր հեպատիտ B և հեպատիտ C հիվանդությունների նվազման միտումներ կան: Այս մասին լրագրողների հետ հանդիպման ժամանակ ասաց Առողջապահության նախարարության հիվանդությունների վերահսկման ու կանխարգելման ազգային կենտրոնի ոչ վարակիչ հիվանդությունների բաժնի պետ Ռոմելա Աբովյանը:

«Նվազումը առկա է սուր և խրոնիկ հեպատիտների դեպքում: Հեպատիտ B-ն 2017 թվականին նվազել է 2.7 անգամ, իսկ հեպատիտ C-ն 2.5 անգամ: Սակայն սրանք այնքան էլ իրատեսական տվյալներ չեն, քանի որ հեպատիտ C-ով հիվանդների 50%-ը տեղյակ չէ իր հիվանդության մասին: Այն ընթանում է առանց ախտանիշների և համաձայն առողջապահության համաշխարհային տվյալների՝ լյարդի առաջնային քաղցկեղով հիվանդության դեպքերի 60 %-ը պայմանավորված է հեպատիտ B-ով և C-ով»,-«Արմենպրես»-ի փոխանցմամբ, ասաց Ռոմելլա Աբովյանը:

Նրա խոսքով՝ Հայաստանում մինչև օրս գրանցվել է հեպատիտ B-ի 404 և հեպատիտ C-ի 768 դեպք:

«Մենք չենք բավարարվում այս տվյալներով և հիվանդանոցներում իրականացնում ենք մշտադիտարկում: Ըստ մեր անցկացրած ուսումնասիրությունների՝ հեպատիտով վարակվելու պատճառ են հանդիսանում կոսմետոլոգիական կենտրոններում և բժշկական կազմակերպություններում հիգիենայի կանոնների կոպիտ խախտումները»,- նշեց նա:

Դրական մարդկանց հայկական ցանց սոցիալական ՀԿ-ի նախագահ Անահիտ Հարությունյանի խոսքով՝ 2017-2018 թվականներին ՀՀ մի շարք քաղաքներում, այդ թվում նաև Գավառում, Սևանում, Մարտունիում, Արմավիրում անցկացրած հետազոտությունների ընթացքում հետազոտվել են 1559 քաղաքացիներ, որոնց հիմնական մասի տարիքը բարձր է եղել 40-ից: Ընդհանուր առմամբ գրանցվել է հեպատիտ C-ի 115, հեպատիտ B-ի 22 և միավարակի 9 դեպքեր»,- նշեց նա:

«Այս հետազոտությունների գլխավոր նպատակն էր բացահայտել, թե իրականում ինչ տարածվածություն ունեն հեպատիտները բնակչության շրջանում: Իրականացվել է հեպատիտ B-ի և C-ի, զուգահեռ նաև ՁԻԱՀ-ի, ՄԻԱՎ-ի ու սիֆիլիսի հետազոտություններ: Այդ ընթացքում բաժանել ենք նաև իրազեկող թռուցիկներ, տվել ենք լրացուցիչ ինֆորմացիա»,- ընդգծեց Անահիտ Հարությունյանը:

Վերջինիս հավաստմամբ՝ Հայաստանում հեպատիտի բուժումը վճարովի է և հասանելի չէ բոլորին:

«Մենք փորձում ենք անել հնարավորին ամեն ինչ, որպեսզի բուժումը հասանելի լինի բնակչությանը: Հեպատիտի դեմ պայքարը բոլորիս խնդիրն է: Առողջապահության նախարարությունը կամ տվյալ հասարակական կազմակերպությունը միայնակ չի կարող լուծել այս հարցն առանց ժողովրդի աջակցության»,-եզրափակեց նա:


Ինչ է ասել Պուտինը Փաշինյանին. դրական եւ բացասական գործոնները

Վարչապետ Նիկոլ Փաշինյանը օգոստոսի 16-ին հեռախոսազրույց է ունեցել ՌԴ նախագահ Պուտինի հետ: Հեռախոսազրույցը տեղի է ունեցել Փաշինյանի նախաձեռնությամբ: Քննարկվել են երկկողմ հարցեր, նաեւ հարցեր ինտեգրացիոն կառույցների, մասնավորապես ՀԱՊԿ շրջանակում գործակցության մասով:

Հեռախոսազրույցն ինքնին ուշագրավ է, մասնավորապես օգոստոսի 17-ի հանրահավաքին ընդառաջ, Հայաստանի ներքաղաքական զարգացումների ֆոնին ընդհանրապես, որտեղ կատարվում են հետաքրքիր զարգացումներ, Ռոբերտ Քոչարյանն է հայտարարում քաղաքականություն վերադարձի մասին, որտեղ հազվադեպ, եզակի խաղաքարտերից մեկն ըստ ամենայնի կփորձի դարձնել հենց Պուտինի աջակցության մասին ստեղծվող պատմությունները:

Փաշինյան-Պուտին հեռախոսազրույցը անշուշտ սպասելի էր, նկատի ունենալով այն, որ օրեր առաջ Հայաստանի վարչապետը նույն թեմատիկայով հեռախոսազրույց էր նախաձեռնել նաեւ Ղազախստանի նախագահի հետ: Այստեղ ակնառու է ՀԱՊԿ գլխավոր քարտուղարի հարցը եւ դրա շուրջ ստեղծված հայտնի վիճակը, նաեւ այդ պաշտոնում Խաչատուրովի հետկանչման ու նոր թեկնածուի համաձայնեցման խնդիրը:

Մյուս կողմից, ՀԱՊԿ թեման ունի նոր երանգ: Ադրբեջանում սկսել են ընդհուպ խորհրդարանի պատգամավորների մակարդակում խոսել այն մասին, որ լավ կլինի անդամակցել ՀԱՊԿ-ին եւ այդպիսով չեզոքացնել հայ-ռուսական դաշնակցության այսպես ասած դիսբալանսը, հավասարեցնել Հայաստանի եւ Ադրբեջանի հանդեպ Ռուսաստանի կարգավիճակը:

Ինչ խաղ է սկսել Ադրբեջանն ու ինչպես է վերաբերում դրան Ռուսաստանը: Փաշինյանը խոսե՞լ է Պուտինի հետ այդ մասին: Հայաստանի դիրքորոշումը այդ հարցում թերեւս քննարկման ենթակա չէ եւ տարբերակներն էլ մեղմ ասած շատ չեն, թեեւ օրինակ Երեւանը կարող է համաձայնել Ադրբեջանի դիտորդական կարգավիճակի քննարկմանը, եթե Բաքուն Ստեփանակերտի հետ ստորագրի զենքի կիրառման բացառման մասին համաձայնագիր, եւ առաջնագծից հետ քաշվեն ծանր տեխնիկան եւ այլ ստորաբաժանումները: Բաքուն հազիվ թե գնա այդ պայմանին, բայց մյուս կողմից միայն այդպիսի նշաձողի դեպքում Երեւանը կարող է համաձայնել քննարկել Ադրբեջանի անդամության հարց:

Եթե իհարկե այդ հարցը ընդհանրապես քննարկելի լինի Ռուսաստանի համար, որովհետեւ Բաքվի ՀԱՊԿ անդամակցումը Ռուսաստանի համար նշանակելու է բալանսի խախտում հօգուտ թյուրքական գործոնի: Այդ իմաստով քիչ հավանական է, որ Պուտինը Բաքվի հետ լրջորեն քննարկի ՀԱՊԿ անդամության հարց, թեեւ միջանկյալ որոշակի խաղը իհարկե չի բացառվում:

Ընդհանուր առմամբ, այդ հարցում Երեւանի համար թերեւս չկա առանձնակի խնդիր, պարզապես պետք է ձեռքը պահել զարկերակին, անսպասելի զարգացումներ բաց չթողնելու համար: Այդ իմաստով Պուտինի հետ Փաշինյանի հեռախոսազրույցը թերեւս նաեւ ունեցել է այդ նպատակը:

Ընդհանուր առմամբ, բացի ընթացիկ խնդիրներից, որոնք անշուշտ շատ են թե քաղաքական, թե տնտեական իմաստով՝ ռուբլու արժզրկում, որը կարող է ազդել Հայաստանի տնտեսության վրա, Հայաստանում ռուսական խոշոր կորպորացիաների գործունեության օրինականություն՝ նախօրեին ՊԵԿ հատուկ ստորաբաժանումը խուզակել էր հայկական երկաթուղու ռուսական կառավարչի գրասենյակը, ռուս-թուրքական հարաբերություն եւ այլ բազաթիվ ռեգիոնալ հարցեր տնտեսության, քաղաքականության եւ անվտանգության ոլորտում, Փաշինյան-Պուտին ֆորմատը ներկայում ունի նաեւ ռազմավարական մի առանցքային խնդիր:

Դա այն ադապտացիայի իրագործումն է, որի մասին Փաշինյանը հայտարարել էր Տավուշի մարզում, անդրադառնալով Լավրովի հայտնի հայտարարությանը: Հայ-ռուսական հարաբերությունը նոր իրողություններին ադապտացնելու հարցում այլ կենսունակ ֆորմատ գոյություն չունի, քան առաջին դեմքերի ֆորմատը: Այստեղ մի կողմից դրական է այն, որ Փաշինյանը արձանագրել է փոխադարձ անկեղծության եւ դյուրին շփման հանգամանքը՝ իսկ դա չէր կարող լինել առանց Պուտինի հետ առնվազն լուռ, բայց անվերապահ համաձայնության, մյուս կողմից խնդիր է այն, որ այդ ֆորմատն օբյեկտիվորեն թույլ չի տալիս օպերատիվ աշխատանք, եւ այստեղ իհարկե կաղալու է ադապտացիայի դինամիկան:

Բայց, կա այն, ինչ կա, եւ դա պետք է լինի Ռուսաստանի հետ աշխատանքի հիմքը, որն այդուհանդերձ դրվել է նվազագույն անհրաժեշտ ծավալով:


Փյունիկը պարտվեց Մաքքաբիին 1-2 (1-2) հաշվով և դուրս մնաց

լուսանկարը՝ Փյունիկի պաշտոնական կայքից

Եվրոպայի լիգայի որակավորման 3-րդ փուլի պատասխան խաղում Փյունիկը արտագնա խաղում 2-1 հաշվով պարտվեց Թել-Ավիվի Մաքքաբիին:

Առաջին գոլը խփեց հայկական թիմի կիսապաշտպան Դենիս Վոյնովը, իսկ երկրորդ կեսում Մաքքաբիից հաջողության հասան Միչան և Ատարը:

Նշենք, որ ավելի վաղ պայքարից դուրս մնաց Հայաստանի չեմպիոն Ալաշկերտը, որը ընդհանուր 0-7 հաշվով պարտվեց ռումինական Կլուժին:


Ալաշկերտը 0-5 (0-7) հաշվով պարտվեց Կլուժին և դուրս մնաց

Հայաստանի չեմպիոն Ալաշկերտը Եվրոպայի լիգայի որակավորման 3-րդ փուլի պատասխան խաղում 5-0 հաշվով պարտվեց Կլուժին:

Ռումինական թիմի կազմում գոլերը խփեցին Բիլլել Օմրանին (2 անգամ), Օվիդիու Հոբանը, Սեբաստիան Մայլատը և Ժան Էմանուել Կուլիոն:

Հիշեցնենք, որ Երևանում կայացած խաղում Ալաշկերտը պարտվեց 0-2 հաշվով:


Շոուն ավարտվեց. Վաղը պարզ կդառնա ամենակարեւորը

Վաղը Նիկոլ Փաշինյանը հանրահավաք է հրավիրել, որտեղ մտադիր է գնահատական տալ իր կառավարության գործունեության 100 օրերին: Այսօր կառավարության նիստին նա արդեն մի քանի թեզ է ներկայացրել: Մասնավորապես, նա ասել է, որ 100 օրվա ընթացքում հաջողվել է լուծել հիմնական խնդիրը՝ նորմալ գործող պետություն եւ տնտեսական զարգացում ապահովել հետհեղափոխական շրջանում: Դրան հաջորդելու է նոր փուլը, որի հիմնական նպատակն է լինելու բարեփոխումների արագացումը, որոնք երկրորդ շունչ եւ երկրորդ արագություն կբացեն:

Նիկոլ Փաշինյանը հնչեցրել է գլխավոր առաջնահերթությունը, որը նրանից սպասում են միլիոնավոր մարդիկ: Բոլորը պետք է իրենց վրա զգան հեղափոխությունը: Առաջին հարյուր օրն աշխատել են հեռուստացույցի վրա՝ հանրության համար բազմաթիվ էմոցիաներ ապահովելով: Հիմա եկել է սառնարանի վրա աշխատելու ժամանակը:

Ի՞նչ բարեփոխումների մասին է խոսքը: Ազատ Արշակյանը, օրինակ, ասում է, որ եթե տնտեսական քաղաքականությունում, առաջադեմ աշխարհի հետ հարաբերություններում, Սահմանադրությունում փոփոխություններ չլինեն, հեղափոխությունն ինքը կարող է հակահեղափոխություն դառնալ, որովհետեւ հեղափոխության իմաստը հեղափոխական փոփոխություններն են:

Փոփոխությունները շատ բարդ ու ցավոտ գործընթաց են: Ամեն ինչ այնքան խառն է, որ մոլախոտի հետ կարելի է նաեւ պտղատու բույսը պոկել: Այդ պատճառով շատ կարեւոր է որոշել առաջնահերթությունները եւ նախ պայմաններ ապահովել հեղափոխական փոփոխությունների համար:

Վերջին ամիսը որպես առաջնահերթություն մարտի 1-ի գործի հետաքննությունն էր: Մարդիկ, մոռանալով առօրյա խնդիրների մասին, հետեւում են, թե կնստեցնեն Քոչարյանին, թե բաց կթողնեն: Նստեցրին եւ բաց թողեցին: Եթե Վճռաբեկ դատարանը հաստատի Վերաքննիչ դատարանի որոշումը Քոչարյանի անձեռնմխելիության մասին, ապա նրա դեմ մեղադրանքը կհանվի: Դա նշանակում է, որ մարտի 1-ի գործը կրկին չբացահայտված կմնա:

Շատերն ասում էին, որ այսպիսի հարցերը չի կարելի շտապողաբար լուծել, առանց լավ նախապատրաստվելու: Բայց նրանք, ովքեր այս օրակարգն էին թելադրում, շուտափույթ դատ էին պահանջում՝ նախապես հայտարարելով, թե ով է մեղավոր: Հիմա արդեն խոսում են «անցումային արդարադատության» մասին, կամ այլ խոսքով՝ հեղափոխական տրիբունալի, որը պետք  պարզի 2008 թվականի մարտի 1-ի մեղավորներին:

Այս օրակարգը կդառնա՞ Նիկոլ Փաշինյանի նոր իմպերատիվը: Օգոստոսի 17-ին ի՞նչ կհայտարարի մարտի 1-ի գործի մասին: Իր տեսաուղերձում նա ասել է, որ բոլոր մեղավորները պատասխանատվության են ենթարկվելու, իսկ կողոպտվածը վերադարձվելու է ժողովրդին: Նա նույն բանը կասի՞ հանրահավաքին՝ պատասխանելով նրանց, ովքեր մարտի 1-ի օրակարգն առաջ են մղում որպես միակ հրամայական:

Շատ փորձագետներ նշում են, որ հասարակության բեւեռացումը «հեղափոխություն-հակահեղափոխություն» սկզբունքով նույնպես օտար օրակարգ է: Այն չի կարող լինել վարչապետի օրակարգը, ով ամբողջ երկրի ղեկավարն է, այլ ոչ թե նրա հեղափոխական հատվածի: Վարչապետը պետք է հաշվի առնի հասարակության բոլոր շերտերի շահերը եւ նրա իմպերատիվը պետք է դառնա նախեւառաջ ազգային համաձայնության ու սիրո մթնոլորտի վերականգնումը:

Այդ մթնոլորտը չի նշանակում, որ մեղավորներն անպատիժ կմնան: Այն ենթադրում է, որ հանցագործություններով իրավապահ մարմինները պետք է զբաղվեն, իսկ մյուսները պետք է իրենց գործով զբաղվեն:


Վարչապետն ընդունել է Գարո Արմենին և Թոնի Շաֆրազիին

Վարչապետ Նիկոլ Փաշինյանն ընդունել է գործարար, «Հայաստանի մանուկներ» հիմնադրամի հիմնադիր և խորհրդի ատենապետ Գարո Արմենին և մշակութային գործիչ Թոնի Շաֆրազիին, ով իր գործունեության ընթացքում համագործակցել է աշխարհահռչակ մի շարք արվեստագետների, այդ թվում՝ Էնդի Ուորհոլի, Ժան Միշել Բասկիայի հետ:

Հանդիպման ընթացքում վարչապետին են ներկայացվել «Հայաստանի մանուկներ» հիմնադրամի գործունեությունը և առաջիկա ծրագրերը, այդ թվում՝ կրթության և մշակույթի ոլորտներում: Գարո Արմենը նշել է, որ նախատեսում են Լոռու մարզի Դեբեդ համայնքում գործող SMART նորարարական կրթական կենտրոնի ձևաչափով կենտրոններ ստեղծել նաև հանրապետության այլ համայնքներում, դրանցում ներգրավել դպրոցականներին և երիտասարդներին, ինչպես նաև բարձրակարգ մասնագետների: Կենտրոնում կուսուցանվեն նորագույն տեխնոլոգիաներ, օտար լեզուներ, արհեստներ, արվեստի տարբեր ճյուղեր և այլն: Գարո Արմենն անդրադարձել է նաև առողջապահության և այլ ոլորտներում նախատեսվող բիզնես ծրագրերին և նշել, որ սփյուռքի տարբեր գործարար շրջանակներ ևս դիտարկում են հայրենիքում ներդրումային նախագծերի իրականացման հնարավորությունները:

Կառավարության ղեկավարը ողջունել է «Հայաստանի մանուկներ» հիմնադրամի գործունեությունը և կարևորել սփյուռքի ներկայացուցիչների կողմից տարբեր ուղղություններով բիզնես ծրագրեր կյանքի կոչելու նախաձեռնությունները և ընդգծել, որ կառավարությունն իր քայլերով ստեղծում է անհրաժեշտ պայմաններ՝ բիզնես ծավալելու և շահույթ ստանալու համար: Միաժամանակ, Նիկոլ Փաշինյանը Գարո Արմենին առաջարկել է ներդրումային ծրագրերն իրականացնելու ուղղությամբ ակտիվորեն աշխատել ՀՀ կառավարության համապատասխան գերատեսչությունների  հետ՝ դրանք արդյունավետ կերպով առաջ մղելու նպատակով:


Քոչարյանը պնդում է, որ իր օրոք մենաշնորհներ չեն եղել

Երկրորդ նախագահ Ռոբերտ Քոչարյանը հայտարարել է, որ իր իշխանության օրոք մենաշնորհներ չեն եղել: Երկիր Մեդիա հեռուստաընկերությանը տված հարցազրույցում Քոչարյանն ասել է, որ իր օրոք 16-17 ընկերություն վառելիք է ներմուծել, 20 ընկերություն բանան է ներմուծել: Հնարավոր չէր 10%-ից ավելի աճ գրանցել, եթե լինեին մենաշնորհներ, ասել է նա:


Եթե ինձ բանտարկեն, ստանալու են քաղաքական բանտարկյալ. Ռոբերտ Քոչարյան

Հայաստանի երկրորդ նախագահ Ռոբերտ Քոչարյանը Երկիր Մեդիա հեռուստաընկերությանը հարցազրույց է տվել: Նա նշել է, որ մտավախություն ունի, որ Գլխավոր դատախազությունը կարող է բողոքարկել իր ազատ արձակման վճիռը: Նա չի բացառել, որ կրկին կարող է հայտնվել մեկուսարանում: Քոչարյանը վստահ է, որ եթե իրեն ազատազրկեն, Եվրոպական դատարանում ինքը հաղթանակ է տանելու:

Քոչարյանն ասել է, որ եթե իրեն բանտարկեն, ստանալու են քաղաքական բանտարկյալ:


Մարդիկ հարցնելու են՝ ու՞ր են Սաշիկի 50%-ները. Ռոբերտ Քոչարյան

Հայաստանի երկրորդ նախագահ Ռոբերտ Քոչարյանը Երկիր Մեդիային տված հարցազրույցում ասել է, որ նոր կառավարության օրոք չկա տնտեսական քաղաքականություն, չի հանդիպել փաստաթղթի, որից կարող է եզրակացնել, թե ինչ է ուզում անել կառավարությունը տնտեսական ոլորտում:

Կա կարգախոս պայքար կոռուպցիայի դեմ, շատ լավ է, բայց դա տնտեսական քաղաքականություն չի: Կոռուպցիայի դեմ պայքարը միայն բռնելը, դիմակներով մտնելն ու ուժ ցուցադրելը չէ, ասել է Քոչարյանը:

Ռոբերտ Քոչարյանի կարծիքով, այսօր ժողովուրդը սկսել է ավելի վատ ապրել, ամեն ինչ կրկնակի թանկացել է:

Երկրորդ նախագահը կարծում է, որ ներդրումներ չեն լինելու, մինչև ներդրողները չհասկանան, թե ինչպիսի տնտեսական քաղաքականություն է տարվում:

Անդրադառնալով բացահայտումմներին՝ Քոչարյանը հարց է ուղղել՝ քանի՞ գործ կա 50% խլելու վերաբերյալ, որոշ ժամանակ անց մարդիկ հարցնելու են՝ ուր են Սաշիկի 50%-ները:


«Ռուսաստանն այն երկիրը չէ, ում հետ կարելի է այս լեզվով խոսել». Քոչարյան

Հայաստանի երկրորդ նախագահ Ռոբերտ Քոչարյանը Երկիր Մեդիա հեռուստաընկերությանը տված հարցազրույցում ասել է, որ մեծ մտահոգություն ունի, որ վարչապետն ասում է, որ աշխարհը պետք է ադապտացվի Հայաստանի իրավիճակին: «Ռուսաստանն այն երկիրը չէ, ում հետ կարելի է այս լեզվով խոսել: Մեր ռազմավարական գործընկերն է և մեր պաշտպանության հարցը մեծ վտանգի տակ կարող է լինել», ասել նա:

Նրա խոսքով, նոր կառավարությունը չի պատկերացնում իրական վտանգները, անում են հայտարարություններ, սակայն տեսնում ենք այլ կարգի քայլեր: Այսպիսի հարցերով չի կարելի կատակներ անել, գինը շատ ծանր է լինում:


RSS

Page Actions

Recent Changes

Group & Page

Back Links