Feb 20, 2019

News

Armenian Video

Hosting

Linki

Armenia

edit SideBar

Szukaj

Lragir - Լրագիր

English

RSS feed: Լրագիր

Արմեն Սարգսյանը ցավակցական հեռագիր է հղել բարերար Լուիզ Մանուկյան-Սիմոնի մահվան կապակցությամբ

Հայաստանի Հանրապետության նախագահ Արմեն Սարգսյանը ցավակցական հեռագիր է հղել ազգային գործիչ ու բարերար Լուիզ Մանուկյան-Սիմոնի մահվան կապակցությամբ: Ինչպես «Արմենպրես»-ին հայտնեցին ՀՀ նախագահի աշխատակազմի հասարակայնության հետ կապերի վարչությունից, հեռագրում ասված է.

«Խոր կսկիծ ու ցավ ապրեցի՝ ստանալով մեր ժողովրդի արժանավոր դուստր, ազգային գործիչ ու բարերար Լուիզ Մանուկյան-Սիմոնի մահվան գույժը:

Այս կորուստը չափազանց մեծ է Հայաստանի, Արցախի ու աշխարհասփյուռ հայության համար, քանզի Տիկին Մանուկյան-Սիմոնն ամենասերտ առնչությունն ուներ այն ամենի հետ, որ կոչվում է հայ ու Հայաստան՝ մշտապես լինելով նրանց կողքին ու նրանց մեջ:

Որպես արժանի զավակ իր ազգանվեր ծնողների՝ Հայաստանի Ազգային հերոս Ալեք Մանուկյանի և տիկին Մարի Մանուկյանի, որպես Հայկական բարեգործական ընդհանուր միության նախագահ ու բարերար, նրա մատուցած ծառայությունները Հայրենիքին, Հայաստանյայց Առաքելական Սուրբ Եկեղեցուն և աշխարհասփյուռ հայ ժողովրդին իրապես բացառիկ են իրենց ծավալներով ու բովանդակությամբ:

Հայաստանի անկախացումից ի վեր Հայաստանն ու Արցախը դարձան նրա հայրենանվեր գործունեության թիրախը, որոնց Տիկին Լուիզ Մանուկյան-Սիմոնը նվիրված մնաց մինչև իր կյանքի վերջը: Որպես Հայկական բարեգործական ընդհանուր միության երկարամյա նախագահ, «Հայաստան» համահայկական հիմնադրամի Հոգաբարձուների խորհրդի անդամ ու պատվավոր անդամ, նա բազմաթիվ ծրագրեր նախաձեռնեց ու իրականացրեց թե՛ Հայաստանի Հանրապետությունում, թե՛ Արցախում, թե՛ Սփյուռքում:

Այդ Մեծ Տիկինն իր ընդգրկուն գործունեությամբ և հեղինակությամբ դուրս է գալիս ազգային սահմաններից և մեր ժողովրդին լավագույն կերպով ներկայացնում միջազգային մակարդակով:

Համազգային կորստի այս ծանր պահին անկեղծ ու խորին ցավակցությունս եմ հայտնում Տիկին Լուիզ Մանուկյան-Սիմոնի ընտանիքին ու հարազատներին, եղբորը՝ Ռիչարդ Մանուկյանին, երեք զավակներին, զույգ թոռներին, Հայկական բարեգործական ընդհանուր միությանը, հոգաբարձուների խորհրդին և կիսում բոլորի վիշտը:

Հիշատակն արդարոց օրհնությամբ եղիցի»:


Յուրա Մովսիսյանը հանդիպել է Հայաստանի կանանց Մ-19 հավաքականի հետ

Հայաստանի ֆուտբոլի ազգային թիմի հարձակվող Յուրա Մովսիսյանն այս օրերին Հայաստանում է:

«Արմենպրես»ի հաղորդմամբ` Հայաստանի ազգային հավաքականի խաղացողն այցելել է ՀՖՖ տեխնիկական կենտրոն/ֆուտբոլի ակադեմիա, որտեղ հետևել է Հայաստանի կանանց Մ-19 հավաքականի մարզմանը, շփվել պատանի ֆուտբոլիստուհիների հետ:


Ռոբերտ Քոչարյանի վտանգավոր հայտարարությունը

Արցախի Վերածննդի տարեդարձի առիթով հայտարարություն է տարածել երկրորդ նախագահ Ռոբերտ Քոչարյանը, որը չի էլ թաքցնում, որ հայտարարության նպատակը շնորհավորելը չէ: Իհարկե, երկրորդ նախագահը հայտարարում է, որ նպատակը Արցախի ու Հայաստանի գլխին կախված վտանգների կապակցությամբ մտահոգությունն է, դրանք ազդարարելը, սակայն գործնականում վտանգավորը Ռոբերտ Քոչարյանի հայտարարությունն ու դրա տողատակն են: Բանն այն է, որ Քոչարյանը Արցախի շարժման տարեդարձի առիթով խոսում է Հայաստանի ու Արցախի համար վտանգների մասին, գործնականում չբերելով որեւէ առարկայական փաստարկ:

Բանն այն չէ, որ վտանգ չկա: Բայց աշխարհը բավական վտանգավոր փուլում է վաղուց, եւ ավելին՝ այդ վտանգներն էլ ավելի խիստ ու արտահայտված էին օրինակ 2013 թվականից սկսած, երբ ուղղակի անզեն աչքի համար տեսանելի ուժգնանում էր Հայաստանի ու Արցախի գլխին կախված պատերազմի վտանգը, որ գրեթե օրեցօր ռեժիմով հասունանում էր Ռուսաստանի եւ Ադրբեջանի ռազմավարական գործակցության հետեւանքով:

Այդ ժամանակ սակայն Ռոբերտ Քոչարյանը կարծես թե որեւէ անհանգստություն չէր արտահայտում, չէր հնչեցնում որեւէ տագնապ: Արդյո՞ք պատճառն այն չէր, որ այդ շրջանում նա զբաղված էր նույն Ռուսաստանի օգնությամբ Սերժ Սարգսյանին իշխանությունից հեռացնելու խնդիր լուծելով՝ ոչիշխանական բեւեռի «անտեսանելի» թիկունքում, եւ քաղաքականապես նպատակահարմար չէր տագնապ հնչեցնել օդում կախված պատերազմի մասին, որովհետեւ դա հնարավոր չէր անել առանց Ռուսաստանին պատասխանատվության տակ դնելու: Իսկ Ռուսաստանին պատասխանատվության տակ չէին դնի, որովհետեւ ամբողջ խաղադրույքն այն էր, որ Ռուսաստանը ոչիշխանական բեւեռին Սերժ Սարգսյանի փոխարեն պետք է դներ իշխանության տեղը:

Հետո իհարկե, 2015-ի փետրվարից հետո, Ռուսաստանը կրեմլամերձ փորձագետներից մեկի միջոցով հայտարարեց, թե ովքեր ակնկալում են Ռուսաստանի օգնությամբ Հայաստանում իշխանափոխություն իրականացնել, կլոուններ են:

Մոսկվան արել էր իր գործը, նա ամենավճռորոշ ժամանակահատվածում նաեւ ոչիշխանական բեւեռի գործուն աջակցությամբ չեզոքացրել էր Հայաստանի դիմադրունակության հնարավոր տարբերակները եւ ապահովել էր կտրուկ, անարժանապատիվ շրջադարձը եվրասոցացման գործընթացից:

Այդ ամենի աղետալի հետեւանքը թանկ կյանքերի գնով կանխեց հայկական բանակը, փաստի առաջ դնելով բոլորին եւ կտրուկ շրջադարձ կատարելով ռեգիոնալ ռազմա-քաղաքական իրավիճակում, ձեւավորելով ներքին ու արտաքին նոր իրողություններ, որոնք Հայաստանին տվեցին նոր քաղաքականության հնարավորություն: Սերժ Սարգսյանը փորձեց օգտագործել այն, սակայն մինչեւ 2016-ի հուլիս, երբ տեղի ունեցավ ՊՊԾ գնդի գրավումն ու ներքաղաքական բարդ ճգնաժամային իրավիճակը:

Սարգսյանին հաջողվեց պահել ներքին իրավիճակը, սակայն անկասկած նաեւ արտաքին հնարավորություններն ու առավելությունը կորցնելու գնով:

Թավշյա հեղափոխությունը Հայաստանին տվել է դրանք վերականգնելու, ըստ այդմ նաեւ անվտանգության միջավայրը զգալիորեն բարելավելու, վտանգները կառավարելու հնարավորություն: Բավական նկատելի են այդ հնարավորությունն օգտագործելու ուղղությամբ մի շարք առանցքային քայլեր՝ թե Արցախի սուբյեկտությունը, թե Հայաստանի աշխարհաքաղաքական դերակատարումը բարձրացնելու ուղղությամբ:

Այդ պայմաններում, սեփական խնդիրները լուծելու համար Ռոբերտ Քոչարյանը տարածում է հայտարարություն, որում խոսելով միասնականության կարեւորության մասին, գործնականում անթաքույց կերպով ջանում է Արցախում առաջացնել Հայաստանի նոր իշխանության հանդեպ անվստահություն եւ անջրպետ, դա անելով Հայաստանի եւ Արցախի ճակատագիրն իր անձնական ճակատագրի հետ նույնացնելու միջոցով:

Թե որքանով են դրանք նույնական, նախօրեին Արցախի ԳԽ առաջին նախագահ, երջանկահիշատակ Արթուր Մկրտչյանի 60-րդ տարեդարձի առիթով միջոցառմանը ներկայացրել էր Արցախի շարժման ակտիվիստ Գագիկ Ավանեսյանը՝ պատմելով շարժման ուշագրավ դրվագներ:


Հրաշալի ընտրություն

ՀՀ գիտությունների ազգային ակադեմիայի նախագահությունը ՀՀ ԳԱԱ Արամ Նալբանդյանի անվան քիմիական ֆիզիկայի ինստիտուտի տնօրենի պաշտոնում միաձայն ընտրեց քիմիական գիտությունների թեկնածու Սեյրան Մինասյանին: Այս մասին հայտնեցին ՀՀ գիտությունների ազգային ակադեմիայի տեղեկատվական-վերլուծական ծառայությունից:

Սեյրան Մինասյանը ծնվել է 1963թ-ին՝ Գյումրիում: 1985թ-ին ավարտել է Երևանի պետական համալսարանի քիմիական ֆակուլտետը: Սեյրան Մինասյանի գիտական հետազոտությունների ոլորտն  ընդգրկում է քիմիական ռեակցիաների կինետիկան և մոդելավորումը, կենսակտիվ մետաղախելատների և հակաօքսիդիչների ռեակցիաները, շրջակա միջավայրի քիմիան: Սեյրան Մինասյանը 55 գիտական  հոդվածի, 65 գիտական զեկուցումների թեզիսի հեղինակ է: Մինչ այժմ ՀՀ ԳԱԱ Քիմիական ֆիզիկայի ինստիտուտի Քիմիական անվտանգության ֆիզիկաքիմիական հիմնահարցերի գիտական խմբի ղեկավարն էր: 2016թ-ից ՀՀ ԳԱԱ Արամ Նալբանդյանի անվան Քիմիական ֆիզիկայի ինստիտուտում գործող Քիմիայի մասնագիտական 017 խորհրդի անդամ է: Սեյրան Մինասյանը զբաղեցրել է ՀՀ բնապահպանության նախարարության Շրջակա միջավայրի վրա ազդեցության մոնիտորինգի կենտրոնի տնօրենի տեղակալի պաշտոնը:


«Ժառանգությունը» հրավիրում է իր 12-րդ համագումարը

20 փետրվարի 2019թ., Երեւան: Փետրվարի 19-ի իր նիստում «Ժառանգության» վարչությունը որոշում է ընդունել կուսակցության հերթական համագումարն անցկացնել մարտի 31-ին, Երեւանում:

«Ժառանգություն» կուսակցության հիմնադրման օրվանից՝ 2002 թվականից, լինելով թվով 12-րդը, համագումարը կհամախմբի Հայաստանի բոլոր ծայրերից ժամանած պատվիրակներին ու հյուրերին՝ քննարկելու հանրապետության եւ հայ ժողովրդի առջեւ ծառացած ներքին ու արտաքին մարտահրավերները:

Կուսակցության գործուն անդամների ներկայիս հավաքում, որը բաց է քաղաքական, հասարակական բոլոր շահագրգիռ ուժերի ու հանրության համար, կլսվեն հրատապ զեկույցներ տեղի ունեցող վերջին զարգացումների մասին, կընտրվի վարչության նոր կազմ եւ կհրապարակվի երկրի արդի իրավիճակից բխող՝ «Ժառանգության» բանաձեւը:

 «Ժառանգություն» կուսակցության լրատվական ծառայություն


ՎԶԵԲ-ը ընդլայնում է Հայաստանում կանաչ ֆինանսավորման ծավալները

ՎԶԵԲ-ը և Կանաչ կլիմայի հիմնադրամը ԱրմՍվիսԲանկին տրամադրել են 2.5 միլիոն Եվրո վարկ՝ փոքր բիզնեսներին վարկավորելու նպատակով և շարունակելու են իրենց աշխատանքը Ամերիաբանկի հետ

  • ՎԶԵԲը և Կանաչ կլիմայի հիմնադրամը համաֆինանսավորում են Հայաստանում նոր GEFF ծրագրի իրականացումը
  • Ամերիաբանկը առաջին բանկն է, որը ստացել է ՎԶԵԲ-ի էներգաարդյունավետության վարկային գիծ
  • ԱրմՍվիսԲանկին տրամադրվել է 5 միլիոն Եվրո էներգաարդյունավետության վարկավորում՝ ՓՄՁ-ներին և բիզնեսներին ենթավարկեր տրամադրելու նպատակով
  • Վարկավորումը աջակցելու է հաճախորդներին՝ կատարելու էներգաարդյունավետ և ջրօգտագործման արդյունավետ ներդրումներ

Հայաստանում էներգաարդյունավետության բարձրացմանն ուղղված ջանքերը առավել խորացնելու նպատակով, ՎԶԵԲ-ը մեկնարկում է Կանաչ տնտեսության ֆինանսավորման նոր ծրագիր, որը համաֆինանսավորվում է Կանաչ կլիմայի հիմնադրամի (ԿԿՀ) կողմից:

ԱրմՍվիսԲանկին տրամադրված 2.5 միլիոն Եվրո վարկավորումից կարող են օգտվել փոքր և միջին ձեռնարկությունները (ՓՄՁ-ներ) և կորպորատիվ ընկերությունները: ԱրմՍվիսԲանկը GEFF-ի ծրագրին միացող երկորդ բանկն է, Ամերիաբանկի վարկային գծի հաջողակ մեկնարկից հետո: Ֆինանսավորումը հասանելի կլինի կանաչ տեխնոլոգիաների ներդրումների, մասնավորապես կլիմայի փոփոխությանն ադապտացման և մեղմացմանն ուղղված տեխնոլոգիաների համար: Հնարավոր ներդրումներն են՝ ջերմամեկուսացման համակարգերը, ֆոտովոլտայիկ արևային վահանակները, երկրաջերմային տաքացման պոմպերը և արդյունավետ ոռոգման համակարգերը: Գործարարները կարող են GEFF-ի Տեխնոլոգիաների ցանկից փնտրել և գտնել Հայաստանում հասանելի կանաչ տեխնոլոգիաները:

Կանաչ տեխնոլոգիաներում ներդրումներ կատարող ընկերությունները կարող են նաև հավակնել Կլիմայի ներդրումային հիմնադրամի (ԿՆՀ) կողմից ֆինանսավորվող պարգևավճար ստանալուն: GEFF-ը ներառում է համապարփակ տեխնիկական խորհրդատվական փաթեթ, որը համաֆինանսավորվում է ԿԿՀ-ի կողմից: Տեխնիկական խորհրդատվությունը աջակցում է կանաչ ներդրումների հնարավորությունների բացահայտման ու գնահատման գործընթացում:

Փետրվարի 19-ին, Երևանում  տեղի ունեցավ Հայաստանում GEFF-ի նոր ծրագրի պաշտոնական մեկնարկի միջոցառումը, որին ներկա էին GEFF-ի բոլոր շահառուները՝ դոնորներ, պետական պաշտոնյաներ, տեղական գործընկեր ֆինանսական կառույցներ, կանաչ տեխնոլոգիաների արտադրողներ և մատակարարներ: ՎԶԵԲ-ի ներկայացուցիչ, Հայաստանի գրասենյակի ղեկավար Դիմիտրի Գվինդաձեն իր խոսքում նշեց, որ «Հայաստանում մեր հիմնական առաջնահերթություններից են ֆինանսական ոլորտի զարգացումը և կանաչ ֆինանսավորման հասանելիությունը: Ուրախ ենք համագործակցել Ամերիաբանկի և ԱրմՍվիսԲանկի հետ՝ նպաստելով էներգաարդյունավետ և ջրի արդյունավետ օգտագործման ներդրումների ծավալների ընդլայնմանը: Այսօր, համագործակցություն հաստատելով ԱրմՍվիսբանկի հետ, որը հայտնի է որպես կայացած հաճախորդների բազա ունեցող բանկ, առավել արդյունավետ կերպով կարող ենք հասնել մասնավոր հատվածի ներկայացուցիչներին, ինչպես Երևանում, այնպես էլ մարզերում»:

GEFF-ը նպաստելու է Հայաստանում կանաչ տնտեսության ստեղծմանը՝ աջակցելով կանաչ ֆինանսավորման ընդլայնմանը համաձայն ՎԶԵԲ-ի «Անցում դեպի կանաչ տնտեսություն»  մոտեցման:

Հայաստանում 1992 թվականի հիմնադրումից մինչ օրս, ՎԶԵԲ-ը կատարել է 1.2 մլրդ եվրոյի ներդրում 168 նախագծերի իրագործման համար, որոնք ուղղվել են ֆինանսական, կորպորատիվ, ենթակառուցվածքային և էներգետիկայի ոլորտներին: Նշված ներդրումների 88%-ը ուղղվել են մասնավոր հատված:

2006 թվականից ՎԶԵԲ-ը 26 միլիարդ եվրո ներդրում է կատարել այն նախագծերի իրականացման համար, որոնք խթանում են անցումը դեպի կանաչ տնտեսություն իր գործունեության 38 երկրներում:


Ամերիաբանկն արժանացել է ՎԶԵԲ մրցանակին

Ամերիաբանկն արժանացել է Վերակառուցման և զարգացման եվրոպական բանկի վեց մրցանակներից մեկին: Մրցանակների արժանացած ընկերությունները Հայաստանում լավագունն են համարվել՝ էներգաարդյունավետ և վերականգնվող էներգետիկայի ոլորտում ներդրումներ իրականացնելու ծրագրերով: Մրցանակների հանձնման հանդիսավոր արարողությունը տեղի է ունեցել փետրվարի 19-ին՝ Արմենիա Մարիոթ հյուրանոցում:

Ամերիաբանկին մրցանակը շնորհվել է «Փոփոխության գործակալ» անվանակարգում՝ ջերմոցային տնտեսություններում կանաչ ներդրումների աջակցության համար:

ՎԶԵԲ կողմից իրականացվող Էներգոկրեդիտ ծրագրի շրջանակում ֆինանսներ են տրամադրվել Հայաստանի ֆինանսական հաստատություններին, որոնք իրենց հերթին վարկեր են տրամադրել մասնավոր և բնակարանային շինարարության ոլորտներին՝ իրականացնելու երկրում էներգիայի առավել արդյունավետ օգտագործմանն ուղղված ներդրումներ:

«Այսօր պարգևատրում ենք մեր լավագույն գործընկերներին՝ լավագույն ծրագրեր մշակելու համար: Եվս մեկ անգամ գնահատում ենք մեր գործընկեր բանկերի կատարած աշխատանքը»,- լրագրողներին ասաց ՎԶԵԲ հայաստանյան գրասենյակի ղեկավար Դիմիտրի Գվինդաձեն:

Ամերիաբանկը վերջին տարիներին միայն ՎԶԵԲ-ից ներգրավել է 100 մլն դոլարից ավել գումար, որից շուրջ ¼-ը ներդրվել է էներգախնայողության ծրագրերի շրջանակներում: Այս մասին լրագրողներին ասաց Ամերիաբանկի կորպորատիվ վարկավորման վարչության ղեկավար Վահան Կաջայանը: Նա նշեց, որ ֆինանսական աջակցությունն ուղղվել է ոչ միայն գործող, այլ նաև զրոյից հիմնվող ջերմոցային տնտեսություններին: Դրանք ծաղկի, լոլիկի, ելակի և այլ արտադրանքի աճեցմամբ զբաղվող ջերմոցներ են: Ֆինանսավորում ստացած ջերմոցային տնտեսությունները գտնվում են Հայաստանի տարբեր մարզերում՝ զբաղեցնելով ընդհանուր մոտ 50 հա տարածք:

«Վերջերս կնքել ենք 12.5 մլն ԱՄՆ դոլարի ներգրավման ծրագիր, որն ամենայն հավանականությամբ կտեղաբաշխենք 2019 թվականի ընթացքում»,- ասաց Կաջայանը:

Մրցանակի արժանացած վեց ընկերություններն ընտրվել են նաև աշխատանքի համար, որ նպաստել են Հայաստանում ածխաթթու գազերի արտանետումների զգալի
կրճատմանը:

Հաշվի առնելով շարունակաբար աճող պահանջարկը՝ ՎԶԵԲ-ը ֆինանսավորման նոր լուծում է նախաձեռնել՝ Կանաչ տնտեսության ֆինանսավորման ծրագիր: ՎԶԵԲ հայաստանյան գրասենյակի ղեկավար Դիմիտրի Գվինդաձեն ասաց, որ արդեն պայմանագրեր են կնքվել որոշ բանկերի, այդ թվում Ամերիաբանկի հետ՝ ծրագրի իրականացման համար:


Կինեմատոգրաֆիստների միությունն իրավաբանական աջակցություն է առաջարկել Հովհաննես Գալստյանին

Հայաստանի կինեմատոգրաֆիստների միության նախագահ Հարություն Խաչատրյանը 17 օր հացադուլի մեջ գտնվող կինոռեժիսոր Հովհաննես Գալստյանին առաջարկում է իրավաբանական ծառայություն` միության ֆինանսավորմամբ:

«Արմենպրես»ի հաղորդմամբ` այս մասին Խաչատրյանը հայտնեց փետրվարի 20-ին լրագրողների հետ հանդիպմանը:

«Հովհաննես Գալստյանը  դատի է տվել Հայաստանի ազգային կինոկենտրոնին, իսկ դատը հետաձգվել է: Գալստյանը ժամանակ չունի սպասելու. նրա առողջությունը վտանգված է: Մենք  մտահոգված ենք Գալստյանի առողջական վիճակով և կրկին կոչ ենք անում բոլոր կողմերին երկխոսության գալ»,-նշեց Խաչատրյանը:

Նա շեշտեց, որ կողմերը պարտադիր պետք է  հասկանան միմյանց, քանի որ առողջությունից ավելի կարևոր բան չկա: «Մենք պատրաստ եք իրավաբանական լուրջ աջակցություն ցուցաբերել Գալստյանին, անել հնարավոր ամեն բան, որ արագացվի իրավաբանական խնդիրների լուծումը: Միության գեղարվեստական խորհուրդը, վարչությունը նորից  խնդրում են բոլորին օգնել կինոռեժիսորին, իսկ նրան կոչ ենք անում դադարեցնել առողջության համար վնասակար հացադուլը»,-եզրափակեց միության նախագահը:


ՀԲԸՄ-ն սգում է սիրելի նախագահ և առաջնորդ Լուիզ Մանուկյան Սիմոնի կորուստը

Լինելով արդի հայ իրականության ամենաազդեցիկ գործիչներից մեկը և հանդիսանալով ՀԲԸՄ հարյուրամյա պատմության մեջ ամենքի կողմից ակնածանքի և հարգանքի արժանացած առաջնորդ, Լուիզ Մանուկյան Սիմոնը հույսի ու ոգեշնչման անջնջելի հետք կթողնի հայ ժողովրդին, Հայրենիքին ու Հայ եկեղեցուն մատուցած անձնվեր ծառայությամբ:

Նրա մահը խոր վիշտ է պատճառել ՀԲԸՄ աշխարհասփյուռ ընտանիքին, որին նա ծառայել է անխոնջ նվիրումով և բացառիկ գերազանցությամբ՝ որպես կազմակերպության առաջին և միակ կին առաջնորդ, սկզբում հանդես գալով նախ որպես Կենտրոնական վարչության անդամ, այնուհետ՝ 12 տարի շարունակ՝ որպես նախագահ:

Տեղեկանալով նրա վախճանի մասին, ՀԲԸՄ գործող նախագահ Պերճ Սեդրակյանը, ով Լուիզ Սիմոնի ղեկավարությամբ գործակցել է որպես փոխնախագահ, նրան բնութագրեց որպես ռահվիրայի ոգու կրողի և իր ժամանակից շատ առաջ անցած կնոջ: «Նա կոչված էր առաջ մղելու ՀԲԸՄ-ն՝ հաղթահարելով բազմաթիվ մարտահրավերներ, դառնալով աշխարհասփյուռ հայության ծառայող հաջողությունների և օգտավետ նախաձեռնությունների շարժիչ ուժը: Նա օրինակ էր բոլոր նրանց համար, ովքեր բախտ էին ունեցել աշխատելու նրա հետ և հետևելու նրա հիասքանչ մտքի թռիչքին: Մշտապես լինելով իդեալիստ, նա, միաժամանակ, գործնական էր, արդյունավետ և իմաստուն, և կարողանում էր կանխատեսել խոչընդոտները և գտնել լուծումներ, որոնք հանգեցնում էին տևական արդյունքների»:

Լուիզ Սիմոնին կյանքում մեծ ճակատագիր էր վիճակված: Պաշտոնավարման ընթացքում նա առաջինն էր, ով Հայաստանում 1988-ին տեղի ունեցած երկրաշարժից անմիջապես հետո կազմակերպեց օգնության համատարած ջանքերը. նա օգնություն և հոգատարություն պարգևել Ղարաբաղյան պատերազմից տուժածներին և նրանց ընտանիքներին, կարևորագույն դերակատարություն ունեցել անկախ Հայաստանի վերածննդի գործում՝ օգնելով հաղթահարել սոցիալ-տնտեսական և կրթական համակարգերի կործանմամբ պայմանավորված բազմաթիվ դժվարությունները:

«Իրապես ապշեցուցիչ էր բազմաթիվ ոլորտներում նրա գործունեության ցանկացած օրը. նա կարողանում էր ոչ միայն շնորհալի կառավարել ընթացիկ գործունեության բոլոր հատվածները, այլև պահպանել ՀԲԸՄ գործող կրթական, մշակութային և արվեստասիրական ծրագրերը սփյուռքի բոլոր հատվածներում», – նշեց պարոն Սեդրակյանը:

Լուիզ Սիմոնի ամենանշանակալի նվաճումներից էին Հայաստանի Ամերիկյան Համալսարանի, ՀԲԸՄ Հայորդյաց տների և ՀԲԸՄ տարեցների բարեգործական ճաշարանների հիմնումը, որոնք, նրա ոգեշունչ առաջնորդության շնորհիվ, մինչ օրս գործում են Հայաստանում:

***
Փետրվարի 20-ի ժամը 13:00-ից մինչև փետրվարի 24-ը ներառյալ, ՀԲԸՄ Հայաստանի կենտրոնատեղիում (2/2 Մելիք-Ադամյան փ.) բացվել է սգո մատյան՝ ի հիշատակ ՀԲԸՄ նախկին նախագահ, ազգային բարերար նորոգ հանգուցյալ Լուիզ Մանուկյան Սիմոնի։ Բոլոր ցանկացողները կարող են այցելել կենտրոն՝ հարգանքի տուրք մատուցելու մեծ հայուհու հիշատակին և գրառում կատարելու սգո մատյանում:


Առողջապահության նախարարը վստահեցնում է՝ բյուջեի ավելացված գումարը բաշխվել է բոլոր բուժհաստատությունների միջև

Հայաստանում առողջապահության ոլորտի բյուջեի համար ավելացված 10 մլրդ դրամը բաշխվել է Հայաստանի բոլոր բուժհաստատությունների միջև՝ ըստ հատուկ չափանիշների: «Արմենպրես»-ի հաղորդմամբ՝ նախարարն այս մասին հայտնեց Ազգային ժողովում լրագրողների հետ ճեպազրույցում:

«Ավելացված 10 մլրդ բյուջեն բաշխվել է Հայաստանի բոլոր բուժհաստատությունների միջև»,-նշեց Թորոսյանը:

Հարցին՝ արդյոք այն հավասարաչափ է բաշխվել՝ նախարարն ասաց՝ բաշխվել է ըստ ծրագրերի, հատուկ չափանիշներով:


RSS

Page Actions

Recent Changes

Group & Page

Back Links